ब्यक्तित्व हो जैकू गंगा जन छालू
आचरण हो जैकू घुघती जन मायालु
हिमालीय से भी ऊंचू हो जैकू मान
कुल देवतो की तरह जैकू हो सम्मान
जैका पैथर सरू उत्तराखंड व्हे जा खाडू
पहाड़ का जनमानस का बाना जु मनखी लडू
चला भै बन्धु इनु आणा और इन्द्रमणि बडोनी हम खुज्योला
कैरी की क्रांति राजधानी गैरीसैण बणौला
जैका चोला मा बेमानी कु एक भी दाग न हो
मन मा जैका पितृ भूमि का प्रति प्रेम की आग हो
जैकी धादन गर्भ माको कु बच्चा भी बिजी जा
जैका शब्द का शंखनादं मरनासन माको मुर्दा भी उठी जा
चला भै बन्धु इनु आणा और इन्द्रमणि बडोनी हम खुज्योला
कैरी की क्रांति राजधानी गैरीसैण बणौला
खरीद न साक जै भग्यानो कु क्वी आत्मसम्मान
पहाड़ का कण कण मा बसदी हो जैकी जान
देश मा हो वु ,प्रदेश मा हो, या चाए वु गढ़देश मा हो
मर्द हो या जनोनु हो चाए वु जोगी जोगेण का भेष मा हो
चला भै बन्धु इनु आणा और इन्द्रमणि बडोनी हम खुज्योला
कैरी की क्रांति राजधानी गैरीसैण बणौला
प्रदीप सिंह रावत "खुदेड़"
No comments:
Post a Comment