घटा छंटेगी,
फ़िज़ा बदलेगी ।
शायद चुनाव ऐगी ।
कुकर बाघ बिरोवू,
बांदर नेवला गुरोवू ।
किले आज एक व्हे होला,
शायद चुनाव ऐगी ।
संसद मा भ्याली तक,
लगांदा छ जू आरोप ।
आज स्यू नेक किलै व्हे होला,
शायद चुनाव ऐगी ।
गरीबा घार मा आज दिन मा,
किलै द्वी जग्यूचा ।
सेठा का दुर्पला मा आज,
किलै झंडा टंग्यूचा ।
शायद चुनाव ऐगी ।
भ्याली तक गौमा,
बेरोजगारू की भरमार छै।
जनता भी पांच सालो ,
हिसाब ले की तैयार छै।
पर आज सरू गौ खाली,
शायद चुनाव ऐगी।
गौ- गौमा किलै फूट व्हे होलि,
भै-भै मा किलै टूट व्हे होलि।
शायद चुनाव ऐगी |
आज स्यू लोवू स्याल,
मुंगरा किलै नि भूखाणू होलू।
आज थानेदार लोखू तै,
आँखा किलै नि दिखाणू होलू।
शायद चुनाव ऐगी।
किलै आज कल हेलिकॉप्टर
उड़णान हवा मा।
शेरूदा किलै टैट बण्यु होलू
सुबेर बटी पव्वा मा।
शायद चुनाव ऐगी।
किलै आजकल क्वी उतारनू पहनू च,
शराफत कू नकाब।
किलै आजकल वैष्णो ढाबा मा,
बिकण बैठी कबाब।
शायद चुनाव ऐगी।
किलै आज दिन रात का पहर,
शैद घुमणा छन। (सफ़ेद पोशाक वाले)
किलै आज कुछ खास लोग,
गुजरों कि गुजरायण सूंघणा छन।
शायद चुनाव ऐगी।
प्रदीप सिंह रावत ''खुदेड़''
No comments:
Post a Comment