मेकू लाण दादू

मेकू लाण दादू , जैंकि होली नौगज धौंपेली 

नौगज धौंपेली  दादू, मुखड़ी रौन्तेली

गाड़ गदनी जैकी दगडी दादू बच्यांदी होली

डाली बौटी जैंकी दगडी दादू छवी लगान्दी होली

जै देखी की दादू सुबेरदा फूल खिल्दा होला

फूल खिल्दा होला दादू भौरा जल्दा होला

मेकू लाण गढ़ कुमौ की वा बांद

गढ़ कुमौ की बांद दादू सुप्न्यों मा रांद

मेरी आंख्यूं की तीस ज्वा बांद  बुजली

मेरा रजोड़े की तिवारी ज्वा बांद सजली

चाँद सुरज से ज्यादा ज्वा बांद होली प्यारी

चाँद सुरज से प्यारी दादू गैणो से न्यारी

मेकू लाण गढ़ कुमौ की वा बांद

गढ़ कुमौ की बांद दादू सुप्न्यों मा रांद

बसंत दादू जैं बांदे की अन्देली लग्दू होलू

कामदेव भी जैं मा रूप पैन्छू मंगदू होलू

शोभनिया होली दादू जैंकी दन्तु की छपाक

दन्तु की छपाक दादू खुट्यू की लपाक

मेकू लाण गढ़ कुमौ की वा बांद

गढ़ कुमौ की बांद दादू सुप्न्यों मा रांद

खेल्दी होली ज्वा बांद चंद्रवटिका मा

हैंसदीहोली ज्वा बांद फुलू की घाटी मा

सेवा कैर ज्वा बांद दादू दाना सयेणो की

दाना सयेणो की दादू नया पुरुणो

मेकू लाण गढ़ कुमौ की वा बांद

गढ़ कुमौ की बांद दादू सुप्न्यों मा रांद

जैंकी ह्त्युं मा होलू स्वाद छत्तीस प्रकार कू

रूप सज्दू होलू जैंकू बिना सोलह श्रृंगार कू

बोली हो दादू वीकी इनि की संगीत बणी जा

संगीत बणी जा दादू गीत बणी जा

मेकू लाण गढ़ कुमौ की वा बांद

गढ़ कुमौ की बांद दादू सुप्न्यों मा रांद

प्रदीप रावत खुदेड़

"http://"