कब तकै

कब तकै लुट्दा तुम ये पहाड़ ते,

हम भी देखदा ज़रा !

कब तकै फोड़दा तुम ये गढ़वाल ते,

हम भी देखदा ज़रा !

तुम जित्दा या यू पहाड़ जितदू,

हम भी देखदा ज़रा !

कब तकै निचोड़ादा तुम यी नदी नयार ते,

हम भी देखदा ज़रा !

कब तकै पिचोंड़दा तुम यी मौयार ते,

हम भी देखदा ज़रा !

नयार नीचड़ोंदी, या तुम पिचोड़ेन्दा,

हम भी देखदा ज़रा !

कब तकै मोरण देंदा स्वीली ते तुम

पीडां अस्पताल की पैड़ीमा,

हम भी देखदा ज़रा !

कब तकै बिकण देंदा तुम

डॉक्टरुं की पोस्टिंग रुप्यों की थैली मा

हम भी देखदा ज़रा !

स्वीली की पीड़ा जितदी या

तुमारी बणायी क्रीड़ा जितदी

हम भी देखदा ज़रा !

कब तकै थामी सकदा तुम,

यू मनख्यूं का उमाळ ते,

हम भी देखदा ज़रा !

कब तकै बंधे सकदा तुम

धीरज रख्या जवान ते,

हम भी देखदा ज़रा !

भाप बणी ऊ उमळदन,

या तुमते फुक्दान,

हम भी देखदा ज़रा !

कब तकै झूठा वादों की थपकी मा,

हिमपुत्र ते सुनींद राख्दा तुम,

कब तकै की आपदा जाळमा फंसे की निश्चिंत रैंदा तुम,  

हम भी देखदा ज़रा !

अपड़ा सवालू ते लेकी या जनता

सड़क्यूँ मा आंदी की नी आंदी,

हम भी देखदा ज़रा !

पुरणा क्रांतिकारयूं का किस्सा सुणी,

क्वी न क्वी नौजवान तपी की आग कन नी होलू बणू

हम भी देखदा ज़रा !

प्रदीप सिंह रावत ''खुदेड़''   

03.08.2015

"http://"